Camiño Portugués
A peregrinación a Santiago de Compostela dende Portugal toma relevancia a partires da independencia do país luso a mediados do século XII, aínda que é posible a súa existencia xa na época alto medieval.
O Camiño Portugués, no seu treito interior cara o norte, herda vías e camiños antigos que atravesan bosques, canles de auga (algunhas con pontes de trazo medieval), zonas con terras de labor, aldeas, vilas e cidades. Así mesmo, destaca nestes camiños a presenza de petos de ánimas ou capeliñas, cruceiros, capelas, igrexas ou mosteiros.
Un dos camiños antigos dos que fai uso é a Vía XIX, vía romana construida no século I d.C. para unir Braga con Astorga, a través da Ponte de Lima, Tui, Pontevedra, Santiago e Lugo, constituíndo así unha das calzadas romanas máis importantes que vertebrou a Gallaecia. Así mesmo, existe unha variante deste camiño pola costa, que cruza o río Miño pola Guarda e conflúe coa variante interior en Redondela.
O Camiño Portugués, cunha lonxitude de 118,6 km e dificultade media-baixa, divídese en seis etapas:
| ETAPAS | LONXITUDE (km) | DIFICULTADE | DURACIÓN |
| Tui - O Porriño | 18,3 | Baixa | 3 h y 40 min. |
| O Porriño - Redondela | 15,6 | Baixa | 3 h y 10 min. |
| Redondela - Pontevedra | 18,2 | Media | 4 h y 35 min. |
| Pontevedra - Caldas de Reis | 23 | Media | 5 h y 45 min. |
| Caldas de Reis -Padrón | 18,7 | Media | 4 h y 40 min. |
| Padrón-Santiago de Compostela | 24,8 | Baixa | 5 h |
O treito do Camiño Portugués que pasa por Arcos da Condesa comeza xunto o rego de Porto (límite entre a parroquia de Arcos da Condesa e a de Briallos) e forma parte da etapa número catro (Pontevedra-Caldas de Reis), con 23 km de lonxitude, dificultade media e 5 horas e 45 minutos de duración. Nesta etapa sucédense os cruces e serpenteos do Camiño coa estrada N-550 e a nova vía férrea de alta velocidade.
Nas proximidades do treito do Camiño ao seu paso por Arcos da Condesa atópase o albergue público de Briallos (Concello de Portas), situado a 500 m da estrada N-550. Dende esta localización ata Caldas de Reis, o peregrino percorre una lonxitude de 4,8 km, cunha dificultade media, alternando vías de terra con pistas alfastadas, durante 1 hora e 15 minutos.
Por Arcos da Condesa, o peregrino camiñará aproximadamente 2 km, que coinciden coa Vía Romana XIX e poderá contemplar, se continua polo treito orixinal, o peto de ánimas ou capeliña de Santa Lucía e a capela que rinde culto á mesma santa. No pórtico desta capela, da que xa se coñece a súa existencia no ano 1607, descansaban os peregrinos, como relataba o señor Félix Barreira Rodríguez, veciño da parroquia. Ao longo do recorrido por Arcos (alterado a finais do ano 2018 para evitar o paso a carón da N-550), atópanse os fitos: 49,580 km, 48,380 km, 47,830 km e 47,450 km. Co cambio de trazado colócanse estes novos fitos, quedando fóra do novo treito tanto o peto das ánimas como a capela de Sta. Lucía no lugar do Ameal.
Trazado do Camiño Portugués ao seu paso por Arcos da Condesa
Trazado actual
Trazado orixinal
Ubicación Peto de Ánimas
Ubicación Capela de Santa Lucía
COLABORACIÓN: Iglesias Feijóo, A. e Vaamonde Balseiro, V.